دافع وائل جمعة نجم النادي الاهلي السابق ومحلل قنوات بي ان سبورتس القطرية عن نفسه إزاء حالة الغضب الأهلاوية ضده، بعد تصريحات الهجومية تجاه بيتسو موسيماني المدير الفني للفريق الأحمر، عقب لقاء الرجاء المغربي في إياب ربع نهائي دوري ابطال افريقيا.
وصعد الاهلي لنصف نهائي دوري الابطال بعد تخطي عقبة الرجاء بمجموع المباراتين (3-2) حيث فاز الفريق الاحمر في القاهرة 2-1، وتعادل ايابا 1-1، ليتأهل للمربع الذهبي لمواجهة وفاق سطيف الجزائري.
وقال وائل جمعة على صفحته بموقع “فيسبوك”: “الأهلي يقدر يحقق أرقام أفضل من اللي عملها موسيماني مع أي مدرب أخر لأنه عنده لاعيبة على مستوى علي، لكن مش معنى كدة إني أتمنى الأهلي يخسر عشان موسيماني يمشي”.
وأضاف: “موسيماني لو فاز ببطولة إفريقيا للمرة الثالثة أتمنى أنه يجدد طموحه مع فريق أخر”.
وأردف: “وفاق سطيف أخرج عملاق إفريقي وهو الترجي، الأهلي بيعرف يحترم منافسيه بشكل جيد، أهم شئ موسيماني يظبط أموره مع الأهلي، لأننا نستحق أداء أحسن من كدة، الرجاء مش النسخة الأفضل، لكن موسيماني محسسنا إن الأهلي فريق صغير، عندنا لاعيبة كويسة، 2 منهم مهاجمين قاعدين على الدكة”.
وأكمل: “لو مفيش لاعيبة كويسة في الأهلي هقولك أنا عاوز نتيجة بس، لكن احنا عندنا لاعيبة كويسة ولازم يكون الأداء أحسن من كدة، الأهلي مش فريق ضعيف، إدارة الأهلي ساكتة عشان موسيماني بيكسب بس”.
وأكد: “الشحات كان أفضل لاعب وخرج، تغيير منعم عمل لخبطة، أنا مشوفتش موسيماني طور أداء فردي للاعب من بداية تعاقده مع الأهلي، عاوز أشوف الأهلي أحسن من كدة أداء ونتيجة، مش عاوز الأهلي يخسر عشان موسيماني يمشي، لا طبعا، لكن بتمنى إنه يكسب بأداء أحسن من كدة”.
